Samherja lykt af málinu !

Verðstríð er nú í gangi á meðal fiskkaupenda í Vestur-Finnmörku í Norður-Noregi. Fyrirtækið Fjordlaks greiðir rétt tæpar 300 ísl. kr/kg fyrir þorsk, sem er úttroðinn af loðnu, án tillits til stærðar og það er löndunarbið hjá fiskvinnslufyrirtæki félagsins á meðan smærri vinnslur á svæðinu fá lítið sem ekkert hráefni til vinnslu.

Þannig lýsir Finnmarksavisen ástandinu og hefur það eftir eigenda fiskvinnslufyrirtækisins Lean Fish að á meðan eigandi Fjordlaks greiði 90 til 100 ísl. kr/kg yfir lágmarksverð fyrir þorskinn þá styttist í að fleiri fiskvinnslur á svæðinu verði að hætta störfum. Hann segir ómögulegt að keppa við hið fjársterka fyrirtæki um hráefnið. Lean Fish er þó sæmilega stórt fyrirtæki og blaðið segir það vera heimsins stærsta útflytjanda á þurrverkuðum saltfiski (klipfisk).

Annar fiskvinnslumaður telur að með þessum yfirborgunum fyrir tiltölulega slakt hráefni sé Fjordlaks einfaldlega að sýna sig, hnykla vöðvana og freista þess að tryggja sér sem flesta báta í viðskipti. Þriðji viðmælandinn segist borga jafnvirði 270 ísl. kr/kg fyrir þorskinn en vegna þess hve loðnugengd á svæðinu hafi aukist þá henti þorskurinn miður til saltfiskvinnslu. Afurðaverðið taki mið af gæðum hráefnisins og minna fáist fyrir saltfisk ef los sé í holdinu líkt og gjarnan gerist með fisk sem liggur í loðnuáti.

Af; skip.is