Trékyllisvík

Í klettagjánni Kistu í Trékyllisvík voru í september 1654 brenndir á báli þrír dæmdir galdramenn. Voru þeir m.a. sekir fundnir um að hafa verið valdir að einkennilegum veikindum og hneykslanlegri hegðun kvenna við messugjörðir í kirkjunni í Árnesi.

Þær voru gripnar þvílíku ofboði með froðufalli, ropi og óhljóðum, að það varð að bera allt að 12 þeirra út úr kirkjunni á einum helgum degi. Galdrafárinu linnti að vísu ekki með brennunum og árið 1670 voru tveir menn úr Trékyllisvík hýddir fyrir galdra.

Skammt fyrir norðan Árnes eru þrír klettadrangar í fjöruborðinu. Þjóðsaga segir að þar hafi dagað uppi tvö nátttröll ásamt hundi sínum, en þau voru á leið frá tröllaþingi sem haldið var á Drangajökli. Á einu tröllinu var greinilegt höfuð en það fauk af í ofsaveðri um miðja 20. öldina.
 

Uppi undir hlíðarrótum Finnbogastaðafjalls í Trékyllisvík er hóll sem kallaður er Kleppa. Þar undir liggur tröllkonan Kleppa, en sögualdarpersónan Finnbogi rammi á að hafa spyrnt yfir hana skriðu til að hefna sín á henni. Aðrar sagnir segja að Kleppa hafi búið í hólnum.

Heimild; Ferlir.

Eldur kom upp á Finnbogastöðum í Trékyllisvík

Athugasemdir

[Anna Karlsdóttir, 16.6.2008 kl. 13:10]

Hefur aldrei neinn stungið upp á því að þú stýrðir sögugöngum um Vestfirði, ég hefði allavega gaman af að fara í eina slíka.

[Níels A. Ársælsson., 16.6.2008 kl. 13:16]

Hahahaha........

Anna mín !

Veistu, ég held ég endi kanski þannig.

Ég fæ ekki að sækja sjóinn, svo takk kærlega fyrir uppástunguna.

[Guðrún Þóra Hjaltadóttir, 16.6.2008 kl. 13:50]

Takk fyrir þennan fróðleik. Égfór um þessar slóðir í fyrrasumar. Þetta er hrein NÁTTÚRUPERLA.

[Níels A. Ársælsson., 16.6.2008 kl. 14:13]

Já Guðrún.

Það er víða fallegt á Vestfjörðum.

Ég segi alltaf að Vestfirðir séu fallegastir allra fjarða í heiminum.