Dæmdur fyrir kjafthátt upp á kóngsins síðu

Bóndinn Jón Hreggviðsson þá búsettur á Efri-Reyni á Akranesi komst enn og aftur í kast við lögin er hann var til saka sóttur á Öxarárþingi í júlí 1693.

Var Jóni í það sinnið gefið að sök að hafa í ölæði látið falla smánarorð upp á kóngsins síðu en ekki þótti samt fullsannað að hann hafi beint þeim illyrðum "til vors æðsta yfirvalds á jörðinni" eins og stendur í dómnum.

En fyrir þær sakir að dólgurinn "var áður þekktur fyrir illmannlega tilburði og atvik, og ekki síður að strákslegum og óráðvöndum orðatiltækjum, fólki til æsingar og ófriðar", þá var honum dæmd stórkostleg húðlátsrefsing.

Auk þess var jón látinn slá sig í þrígang á munnsöfnuðinn, sjálfum sér og öðrum til áminningar vegna sinnar lygatungu og fyrirlitningar.