Minni Vestfjarða

Sú var tíð að sjávarþorpin á vestfjörðum voru eins og blóm í eggi. Iðandi mannlíf, menning og sagan út um allt.

Eins og segir í sögu Hrafna flóka. "smjör draup af hverju strái" eilíft vor í lofti og bjartsýnin réð ríkjum hjá hverri sálu.

Fólkið sem bjó í þorpunum byggði sér bæi, skóla, bryggjur, flugvelli og vegir voru lagðir. Útvegsbændur byggðu sér öflug skip og fiskhús af flottustu hönnun þess tíma.

Fræknustu sjómenn og fengsælustu skipstjórar við N Atlandshaf mönnuðu flota vestfirðinga sem var sá öflugasti og best búni í víðri veröld. Valinn maður í hverju rúmi.

Harðduglegir íbúar þorpana höfðu nóg að bíta og brenna og atvinnan var meiri en næg fyrir alla.

Erlendir sem íslenzkir farandverkamenn komu í þorpin til að aðstoða heimamenn við að gera verðmæti úr öllum þeim afla sem barst að landi.

Frystihús, salthús, skreiðarhús, fiskimjölsverksmiðjur og lýsisbræðslur voru í hverju þorpi sem möluðu samfélaginu og eigendum sínum gull allt árið.

Peningarnir flóðu frá útlöndum líkt og í lækjum og hagsældin í þorpunum var mikil.

Árið var 1983: Fiskifræðingar og stjórnmálamenn fundu það út að þorskstofninn við Ísland væri ofveiddur.

Þetta sama ár var komið á kvótakeffi við stjórn fiskveiða. Vestfirðingar vöruðu við slíkum bölsýnis spám og töldu að um náttúrlega niðursveiflu væri að ræða.

Vestfirðingar vöruðu við markaðsdrifnu kvótakerfi í fiskveiðum og að sjávarþorpin við Ísland gætu nánast þurkast út þar sem fiskveiðiheimildirnar færðust á hendur örfárra braskara sem gerðu sér sjómennina að þrælum og leiguliðum.

Árið er 2009.

Sjávarþorpin á Vestfjörðum og víðast hvar á landinu eru eins og eyðibýli. Skipin upp höggvin, brend, sökt, eða þeim hreinlega verið stolið eins og mörg dæmin sanna.

Tilvitnun í Íslandsljóð Einars Benediktsonnar.

Þú fólk með eymd í arf !

Snautt og þyrst við gnóttir lífsins linda,

litla þjóð, sem geldur stórra synda.

Tilvitnun lýkur.

Örfá sjávarútvegsfyrirtæki eru eftir á Vestfjörðum, nánast allur flotinn er farinn.

Stór hluti af íbúunum er flúin eða við það að flýja.

Þeir sem fara og eru farnir eru flest allir meira og minna gjaldþrota og eignarlausir.

Þeir sem eftir hokra verða að sætta sig við sjálfskipuð yfirvöld þorpanna sem haga sér flest líkt og Jóhann Bogesen stórversír á Óseyri við Axafjörð forðum daga í söguni Sölku Völku.

Það er komið meira en nóg af ofbeldi sem íslenzk stjórnvöld hafa farið fram með gegn íbúunum í sjávarþorpum vestfjarða.

Það verður aldrei sátt né friður á meðan ekki verður snúið til réttlætis og fiskveiði auðlindinni aftur skilað.

Sjávarútvegur og landbúnaður verði efldur

Athugasemdir

[Sigurbrandur Jakobsson, 8.3.2009 kl. 21:36]

Þetta er hvergi orðið svipur hjá sjón

[Jóhannes Ragnarsson, 8.3.2009 kl. 21:37]

Frábær pistill, hvert einasta orð, frá upphafi til enda.

[Rakel Sigurgeirsdóttir, 8.3.2009 kl. 22:03]

Ég fæ alveg sting í hjartað af því að lesa þetta enda bundin Vestfjörðum sterkum böndum. Sérstakt þar sem ég hef aldrei verið búsett þar utan eitt ár í bernsku.

Ég á reyndar flestar mínar ættir að rekja vítt og breitt um Vestfjarðakjálkann og kannski er það þess vegna sem mér finnst rætur mínar einkum vera þar. Kannski er það líka þess vegna sem mér finnst hvergi fallegra á Íslandi en þar og kann nær undantekningalaust svo vel að meta allt það sem er vestfirskt

Finn til heilagrar reiði yfir því hvernig hefur verið farið með þetta fallega byggðarlag og allt það þolgóða og dugmikla fólk sem vildi svo gjarnan búa þar. Finn til aðdáunar gagnvart því fólki asem býr þar enn og neitar að hrekjast brott þrátt fyrir þá grófu aðför sem hefur verið gerð að skilyrðum búsetu á þar. 

Ef ég vildi tilheyra einhverjum hópi þá vildi ég helst tilheyra Vestfirðingum! 

[Heimir Tómasson, 8.3.2009 kl. 22:47]

Heyr.