Íslenzk kvikmynd.

Anno; 1924. Loftur Guðmundsson ljósmyndari framleiðir kvikmynd.

Loftur Guðmundsson ljósmyndari hefur gert kvikmynd í sex köflum, er sýnir dagleg störf Íslendinga. Eru þar sýnd vinnubrögð um borð í togurum og verkun aflans í landi, sýndur er heyskapur, bæði á smábýlum upp á gamla vísu og á stórbýlinu Hvanneyri, þar sem vélarnar vinna erfiðustu verkin. Auk þess eru ýmsar landslagsmyndir, sumar mjög fagrar, myndir af Reykjavík og helztu kaupstöðum, ennfremur myndir af föngulegum konum og fallegum ungum stúlkum í alls konar búningum. Yfirleitt þykir myndin hin prýðilegasta.