Hvað verður nú um íslenzka aflamarkskerfið illræmda ?

Öflugir flotar fiskiskipa ganga svo hart að mörgum fiskistofnum að veiðarnar hafa ekki bara áhrif á stærð stofnanna heldur einnig á það hvernig erfðafræðileg framþróun þeirra verður. Taka þarf þetta með í reikninginn við stjórn fiskveiða.

Þetta er niðurstaða sérfræðinga við norsku hafrannsóknastofnunina og háskólann í Björgvin í Noregi, sem birt er í grein í nýjasta hefti vísindaritsins Science.

Greinarhöfundar segja að margir nytjastofnar hafi þegar þróast á þennan hátt og auk norska vertíðarþorsksins nefna þeir þorskstofna við Kanada og skarkola í Norðursjó. Breytingarnar leiða til þess að meira verður af smáfiski í aflanum en áður.

Vísindamennirnir taka fram að erfðabreytingarnar verði á tiltölulega fáum árum en erfitt sé hins vegar að snúa þróuninni við.

Þeir telja nauðsynlegt að stjórna veiðum úr fiskistofnum með tilliti til erfðafræðilegrar framþróunar þeirra og benda á að tiltölulega auðvelt sé að búa til reiknilíkön sem nota megi við slíka stjórnun.