Blakkát

Dauðinn vitjaði mín í nótt

 

en forðaði sér er hann sá til mín.

Helsjúkur hugur minn

hafði gefið mér miða

á fyrsta farrými til helvítis.

Sent mig í endalausa myrkvaða hugarangist

djöfullegs innrætis.

 

Vítislogar bíða rétt handan við hornið

á mínum saurugu grundum

sem aldrei verða slegnar framar.

Það varð ótímabær seinkun á brottför

og eftir stendur samviskan

líkt og nauðgað sjávarþorp

eftir markaðsdrifið kvótakerfi andskotans.

 

Vængjasláttur hamingjunnar er þagnaður.

Það er nótt í sálu minni

hryggð í hjarta

lendur hugans frostnar í hel.

 

Lítill fugl flýgur hratt fyrir stafni

en sveigir skyndilega undan vindi

steypir sér niður að öldutopp

líkt og honum fatist flugið

en þýtur svo snöggt upp og hverfur út í blámann.

 

Angan af söltu brimi og þangi

leggur fyrir vit mín.

Ég geng út götuna meðfram sjávarhömrum

og nem ekki staðar fyrr en í sólsetri eilífðarinnar.

Söngur litla fuglsins heyrist aldrei meir.

18 mánaða fangelsi fyrir kynferðisbrot

Athugasemdir

[Jón Steinar Ragnarsson, 13.12.2007 kl. 17:25]

Magnaður kveðskapur Nilli. Maður sér þetta í myndum og finnur ilm, heyrir hljóð og nemur vind.  Þú mátt sannarlega gera meira af þessu, þótt mér líki síður beinar pólitískar tilvísanir í svo fallegum prósa.

[halkatla, 13.12.2007 kl. 19:09]

er þetta eftir þig? vá mér fannst þetta flott og ég er ENGIN ljóðamanneskja!

[Níels A. Ársælsson., 13.12.2007 kl. 19:18]

Hmm, takk, takk Jón og Anna. Já Anna, höfundurinn heitir víst Nilli .........Blakkát var samið fyrir átta árum út á rúmsjó er fréttir bárust af svipuðu máli og viðhengd frétt.

[Grétar Rögnvarsson, 13.12.2007 kl. 21:00]

Vissi nú alltaf að þið væruð hagmæltir Tálknfirðingarnir.

[Níels A. Ársælsson., 13.12.2007 kl. 21:04]

Já og skáldmæltir Grelli. Takk fyrir innlitið gamli vinur.

[Grétar Rögnvarsson, 13.12.2007 kl. 21:06]

Maður kíkir nú alltaf á þetta kjarnyrta og skemmtilega blogg frá þér Nilli minn.

[Níels A. Ársælsson., 13.12.2007 kl. 21:11]

Sömuleiðis skoða ég þína síðu vinur. Þú stendur þig bara þræl vel á blogginu Grelli.