Villta sauðféð í Tálknanum

Hér eru synir mínir Styrmir og Guðmundur með fjallið Tálkna í baksýn baðað í kvöldsólinni. Við skruppum í fjöruferð út að Sellátrum í Tálknafirði undir miðnættið í gær. Fjallið Tálkni dregur nafn sitt af landnámsmanninum norska "Þorbirni tálkna" en han nam Patreksfjörð hálfan og Tálknafjörð allan ásamt bróður sínum "Þorbirni skúma" en þeir voru synir "Böðvars blöðruskalla".

Í klettótum fjallshlíðum Tálkna gengur sauðfé villt allt árið og hefur gert í marga áratugi. Fer tvennum sögum af fjölda þeirra kinda sem þar lifa en flestir eru á því að þær skipti tugum en sumir halda því fram að þær séu á annað hundrað.

Ýmsir sjálfskipaðir postular varna gegn riðuveiki hafa lagst í hernað gegn þessu einstaka sauðfé og reynt allt hvað af tekur til að útrýma því með öllum tiltækum ráðum, en ætíð þurft að láta í minni pokann. Frægasta atlagan sem gerð var að fénu var þegar sýslumaðurinn á Patreksfirði fékk til liðs við sig þyrlu Landhelgisgæslunar ásamt Víkingasveitinni vestur.

Upphófst þá gríðarleg skothríð frá Víkingasveitinni út um dyr þyrnunnar sem flaug fram og aftur um hlíðar fjallsins. Sögur herma að ekki ein einasta kind hafi orðið fyrir skoti og flúðu sérsveitarmenn með skottið á milli lappanna suður í 101 Reykjavík.

Sauðféð í Tálkna lifir góðu lífi og fjölgar sér jafnt og þétt þrátt fyrir harðar atlögur að því annað veifið. Mun þetta vera einsdæmi í öllum heiminum um viltar sauðkindur. Ég legg til að stofn þessi verði alfriðaður sem allra fyrst landi og þjóð til heilla.

Á skáldatali

Hér er hann vinur okkar "Nonni" (Guðbrandur Jón Herbertsson). "Sameign allra landsmanna".

Hann kom eins og venjulega í kaffi út að Skógum í veðurblíðunni en í þetta skiptið var hann svo heppinn að "skáldið úr Vík" var á línunni.

Nonni og skáldið eru ævivinir og kættist hann mjög við að heyra í sínum gamla skips kamerad eins og sjá má á meðfylgjandi mynd.

 

En kannast einhver við höfundinn af þessari ?

Eftir hvern er myndin ?

Egill tálgar spýtu

Emil hét strákur sem átti heima í Kattholti í Smálöndum. Hann var svo dæmalaust fríður að hann leit helst út fyrir að vera algert englabarn. En enginn skyldi ímynda sér það því Emil gerði fleiri skammarstrik en dagarnir eru í árinu. En Emil gerði líka margt gott og það má segja honum til hróss að hann gerði aldrei sama skammarstrikið nema einu sinni.

Egill minn er ekki síður fríður og tálgar spýtur þrátt fyrir að hann geri aldrei skammarstrik líkt og pabbi sinn. Hm

Myndir frá tjaldstæðinu í Tálknafirði

Skaust út og tók þessar myndir fyrir Öllu bloggvinkonu mína.

Bjarmi Níelsson

Hér er fóstursonur minn hann Bjarmi Níelsson. Bjarmi er af kyni Newfondland hunda fæddur á Englandi árið 2000. Hann fluttist til Íslands 4. mánaða gamall og dvaldist í 6. vikur í Hrísey í einángrunarbúðum fyrir ferfætlinga og fiðurfé áður en hann fékk að fara til fjölskyldu sinnar að Skógum.

Bjarmi býr á Tálknafirði ásamt eiginkonu sinni, Venusi sem er af sama kyni ásamt fjórum börnum þeirra þeim, Tálkna, Mai, Penilópu og Sætu. Bjarmi er mikill sjóhundur og elskar að synda og busla í sjó, ám og vötnum. Komið hefur fyrir að kappinn syndir svo langt til hafs að hann sést ekki frá landi langtímum saman föður sínum til mikillar hrellingar, en ætíð hefur hann skilað sér til strandar þó seint komi.

Voff voff..............